2019 को सिक्किम विधानसभा र लोक सभा दुवै आसनको चुनावी गर्मी प्रारम्भ भएको छ। मूलतः 4, 23, 325 मतदाता रहेको सिक्किमको चुनाउमा यसपाली भने सत्तारूढ़ एस.डी.एफसँग विपक्षी प्रायः सबै दल एक भएर चुनाउ लड्ने संकेत देखिएको छ। यद्यपि चुनाउ अघि यस विषयमा ठोकुवा भने गर्न सकिँदैन। एस.डी.एफ.को पवन चामलिङ सरकारले भारतमै सबैभन्दा अधिक राज गर्ने सरकारको रूपमा परिचित हुनुको साथसाथै शिक्षा स्वास्थ्य, पर्यटन एवं जैविक कृषि क्षेत्रमा गरेको योगदानलाई आज भारत सरकारको अतिरिक्त विश्वकै विभिन्न देशहरूले पनि मानेकाले सिक्किम पूर्वत्तर राज्यहरूमा सर्वश्रेष्ठ राज्यको रूपमा ठहरिएको छ।
तर पुग्न-पुग तीस वर्षको अवधिसम्म राज गर्ने पवन चामलिङको कार्यकालमा धेरै काम भए तापनि परिवारवाद र करप्सनबाट भने अक्षुण रहन नसकेको एण्टी इन्कन्भेन्सीहरू जन्मिएकोले प्रमाण गर्दछ। प्रत्येक चुनाउमा विपक्षीहरू जन्मिए तापनि उनीहरूको सिद्धान्त बेग्ला बेग्लै भएकाले गठबन्धन गरेर चुनाउ लड्न नसकेकाले आजसम्म हारको सम्मुख हुन परेको छ। यस अतिरिक्त केन्द्र सधैं राज्य सरकारसँग नै रहेकाले सिक्किममा विपक्षीहरूलाई गाह्रो भइरहेको थियो भने यसपाली केन्द्र र राज्य सरकारमा साह्रै राम्रो तालमेल नरहेको देखिँदैन अनि प्रायः विपक्षी दलहरू एकजुट हुने संकेत देखिएको छ। यसो हुँदा एस.डी.एफ. सरकारलाई फेरि सत्तामै रहन भने गाह्रो पर्न सक्छ। तर विपक्षी एक नभए स्वतः चामलिङ सरकार सत्तामा यथावत रहनेछन् भन्ने कुरो बुद्धिजिवीहरूले अनुमान लगाएका छन्।
